絲絲講場：Ironman馬斯克管理時間好神奇

馬斯克每周平均工作85至100個鐘，除開六日即是每日做足16小時以上！佢基本上唔接電話，仲專登用個超複雜嘅電郵地址避收無謂嘅電郵。

5分鐘為單位 周日陪屋企

不過，佢最關鍵嘅時間管理秘技係，佢將每日日程細分為好多個5分鐘時段，一般人好少上心5分鐘時間點用，好多時乜都冇做就過咗，相反馬斯克以5分鐘為單位來安排工作，連一分一秒都唔放過，就連佢食晏亦一般控制喺5分鐘之內！

仲有樣，就係佢鐘意n樣嘢一齊做，經常喺開會時食晏兼Check電郵，好自然亦同時搞Tesla同SpaceX。逢周一與周五佢通常喺SpaceX，周二、三同四就喺Tesla，周六就「擲銀」決定，周日必定留畀佢五個仔同家人。

咁佢平時一日係點過？佢每日瞓6個鐘，朝早7點起身，通常唔食早餐，偶爾食時就快飲杯咖啡加隻煎蛋。不過有樣嘢無論點佢都必做嘅，就係沖涼，佢話係佢最重要嘅日常習慣！

佢唔多花時間喺食，只用5分鐘食晏，晚餐基本亦唔會食太多，商務應酬就另計。為保持身形，幾忙佢每周會去Gym一至兩次Keep Fit。

話時話，馬斯克早排同安芭赫德（Amber Heard）甩咗拖，睇嚟佢呢幾個月應該慳到唔少時間。

余絲韻