今日，我暫時唔想再就個市嚟緊會點走寫多半句喇，反正我話過恒指於今個星期最好收穩於28,951點之上，而今個星期又未過，講嚟都多餘。我倒想講吓我批至愛的手機設備股，例如丘鈦科技（01478）同舜宇光學（02382）。
早於九月一日同十三日，我已經於本欄發表過文章，話丘鈦管理層唔知做咩，係咪食咗「誠實豆沙包」？竟然自爆鏡頭的出貨量增長會於未來呈放慢的勢頭，完全破壞了科技股PE高少少唔緊要，最緊要買個dream的行規。兩篇文章出街的時候，股價分別是19.6元同14.64元，周四是12.12元。
唔講嗰句都講埋喇，我於半個月前預售了於一月的talk騷門票，海報上最吸引的賣點之一，就是「有寶股要被剔除」，我諗都好呼之欲出啦？
上月「二寶」舜宇出了十月份的出貨量，按年同按月都比預期差，但股價不跌反升，當時佢個friend瑞聲科技（02018）出了份好靚的業績，叫做幫行業沖喜吓，加上舜宇當時憧憬染藍，刺激到股價跌都跌唔落。
若然你唔信的話，翻查吓我的Fb或者網上直播的片段，我當時就話管理層即管賴十一假期啦，話長假期間工廠有幾日停咗工，影響咗產量啦，到十二月公布十一月數據時，就乜嘢都會見真章，唔到你狡辯。結果，我想大家望望個股價都知咩事！
到底要被剔除的股份會係一隻、兩隻抑或是三隻呢？（你知啦，有人話瑞聲同舜宇係同一樣嘢嚟嘛）其實我係唔會在這裏揭曉答案的，唔好意思，寫這篇文的目的，擺到明就是用來賣關子的。
總之，就算丘鈦同舜宇於這一刻唔再跌都好（再跌就唔好啦），都請大家唔好再咁念念不忘佢哋，以為以前嗰種大升勢會重臨，係唔會的喇，有時啲嘢過咗去就過咗去，醒下啦你哋！
富昌金融研究部總監 譚朗蔚（作者為註冊持牌人士，持有瑞聲）