國家統計局昨日表示，傳統行業產能過剩的矛盾並沒得到根本緩解，但係同時間房地產市場平穩，三、四線城市去庫存在紮實地進行，成效明顯。古勝第一時間想起隻水泥股一哥海螺水泥（00914），今年發改委全力推動去掉老舊產能，內地水泥價格持續上揚，加埋樓市相關投資火熱，相輔相成，水泥企業的業績大爆發，海螺首三季大賺98億元人仔，大升64%。
無疑今年嗰份業績有九成九機會破紀錄，問題係好日子可唔可以持續。供給側改革持續，按國統局的繼續大範圍去產能的國策，海螺業績在高位保持的機會應該唔細。
最近海螺創業（00586）同東江環保（00895）簽合作協議，在固廢處理合作，有助海螺創業打入廣東省市場外，亦都幫到海螺。在額外需求帶動，關閉個別廣東及廣西省產能過剩廠房的風險減低。
市場估計今明兩年海螺可賺約110億及120億元人仔，一七年市盈率14倍，瑞信及摩通分別睇42元及40元。早前海螺股價衝上39.1元，目前在35元邊反覆，如果見基金計數，年底前壓到落50日線即34元左右，一於睇番佢。
聯儲局議息無驚喜，加息四分一厘，同埋明年預測再加三次都係市場預期之中。卸任在即的主席倫媽仲話自己近排失眠少咗。
毫無疑問，即使倫媽是近代聯儲局主席中，唯一一個只做得一屆任期的主席，但卻異常咁好腳頭。對比上一任主席伯南克，做唔夠兩年爆大鑊搞個次按風暴，最後史無前例用三輪量寬救番美國經濟避過跌入大蕭條，倫媽可謂行運醫生醫病尾，任內無風無浪，經濟及股市承接「直升機賓」大水猛灌年代，欣欣向榮。
對住美國企業盈利及就業市場持續改善，仲有低到離奇之通脹環境，完全無視加息牛氣沖天的股市，倫媽當然如魚得水，想點就點。到明年鮑威爾接掌，佢做成點大家只能拭目以待。不過，倫媽臨走都交個難題畀佢，話委員要反思通脹持續低迷的背後成因。
話說回頭，明年通脹假如衝上2%目標之上，古勝最想睇新科主席對住歷史高峰的美股，同為刺激民望乜都做得出的「侵侵」，到底有冇「吉士」狠狠加息將股市泡沫刺破。
周三大戶逆向操作，在加息前挾起滙豐控股（00005）推高港股，「Buy on rumor,sell on fact」，昨日個市表現反覆，衝高後又再偏軟，恒指最高上到29,367點，掂一掂十一月三十日的下跌裂口後縮番轉頭，埋單跌55點報29,166點。
聖誕關係，一七年港股已進入最後倒數，基金經理都陸續計數收爐，議息後，相信現貨交投會逐漸趨向淡靜。
焦點股滙控衝上80.4元海嘯新高後倒跌0.5%報79.55元，騰訊控股（00700）升0.4%報397.2元，16球易手創咗一個半月新低。近排北水收斂，股王都無咗之前衝往440元的氣勢。
大銀行未有追隨聯儲局加P，地產股出乎意料氣氛唔錯，其中恒基地產（00012）升1%，新鴻基地產（00016）升3.2%。樓價持續破頂，地產股短期有機會趁港息唔郁住來個死貓彈。
古勝