Bitcoin（比特幣）狂潮可以有幾癲？有人放盤賣樓講明唔收真金白銀，只收Bitcoin！
有業主喺美國上市地產代理行Redfin Corp.放盤，放售一個邁阿密嘅一睡房頂層住宅單位，賣價係33個Bitcoin，業主講到明只收Bitcoin！
嗰間代理行亦有其他七十幾個放盤業主肯收Bitcoin，不過啲業主同時亦願意收錢，啲盤多數喺加州或南佛羅里達州。至於業主堅持只收Bitcoin唔收真金白銀，今趟係首次！
個樓盤賣大概幾錢？喺絲絲寫稿嘅呢秒鐘，每Bitcoin兌1.658萬美元，33個就約值54.7萬美元（約426萬港元）。不過，下秒就唔知嘞。
余絲韻