絲絲講場：大摩「整糕Bell」籌得350萬

話說摩根士丹利連續廿一年參與嘅「愛心聖誕大行動」又嚟嘞，大摩響起「整糕Bell」，今年適逢佢哋在港成立30周年，員工精心整咗30個蛋糕作慈善拍賣。

最貴蛋糕13.2萬成交

大摩今次蛋糕拍賣連同管理層獻唱聖誕歌籌款，合共籌得350萬元破紀錄善款，將會捐助畀一啲慈善團體嘅兒童服務。

今年籌得善款最多嘅蛋糕，名堂係「One Direction 2017」，寓意牛市繼續一支金箭只向上飆！焗呢個蛋糕嘅係摩根士丹利亞洲私人財富管理中國及香港區主管韋王維芬，果然係入得廚房、出得廳堂，聽聞單係呢個蛋糕已籌得13.21萬元！

高浩灃領高層唱聖詩

其實今次蛋糕拍賣中，仲有好多特色蛋糕，其中一個更加係中、西合璧，搵埋聖誕老人一齊扒龍舟去送聖誕禮物添，呢個亦籌得9.11萬元！

不過，重頭戲當然係尋日由摩根士丹利亞太區聯席首席執行官高浩灃，率領約100位大摩高層於總部環球貿易廣場（ICC）獻唱聖詩，且仲請埋一班小朋友同台表演。

數吓手指，大摩廿一年來參與「愛心聖誕大行動」，累計已籌咗3,200萬元善款，受惠機構達到170個，希望明年能繼續努力，再破善款紀錄！

余絲韻