絲絲講場：董明珠帶機械人回鄉打Band
周四喺南京開幕嘅2017年世界智能製造大會中，珠海格力電器董事長董明珠（明珠姐），喺五組格力機械人組成嘅樂隊伴奏一曲《歌唱祖國》，而佢亦上台講述格力智能製造創新之路。
睇嚟明珠姐嘅心情真係比較激動，仲語帶哽咽地講：「格力機械人來到了我嘅家鄉，給在座嘅朋友演奏，我感到更加自豪！」
機械人係明珠姐大談「智能製造」嘅一個引子。佢就話：「過去大家只要能生存和賺錢就滿足，但在新時代只有成為創造者，才能讓世界變得更美好。」係咪好發人深省呢？
格力150億建智能基地
明珠姐並非空談，並即時就拿格力舉例稱，格力已經從空調生產製造企業，轉變為能夠設計生產智能裝備、機械人等多個產業鏈嘅大型製造集團。格力早前就確定將會喺河南洛陽，豪花150億元人民幣，打造自主創新智能製造基地。
明珠姐強調，中國企業要勇於創造才有未來，就好似格力喺二○一二至二○一七年第三季，營業總收入達到6,800多億元人民幣，而二○一一年之前嘅二十年則只有3,700多億元人民幣，取得如此成果，正正就係因為注重供給側改革（從供給、生產端入手）。
至於呢次大會，原來係繼今年五月江蘇發展大會之後，明珠姐再一次回到家鄉南京公開演講。
不過，呢次帶埋格力原創嘅機械人返鄉，明珠姐就話好有衣錦還鄉嘅感覺喎！
余絲韻