Market Insight：大型內銀股相對佔優
內房股能逆市做好，皆因十九大期間並未有加大內房調控的消息出現，冇壞消息即係好消息。融創中國（01918）上升3.9%、雅居樂集團（03383）升2%、碧桂園（02007）升6%、華潤置地（01109）則升1.4%。
點解成日話內房泡沫，但啲內房股都仲可以喺咁升？古勝都係嗰句，內房泡沫已猶如綁架了地方政府財政同銀行資產負債表，嚴格嚟講係「爆不得」，調控是有，但以穩為主。班芬佬睇穿呢個底牌，又要揸番啲中國股票，內房股又係權重板塊，點都要揸番啲！
講起內銀股，將公布第三季度經營數據，綜觀大行的睇法都算正面，主要是認為內銀股的基本因素有改善，但大型與中小型銀行的表現差異會較大，大型內銀的非利息收入按季有望持續擴闊，但中小型內銀就未必。主要是大型銀行的新貸款主要依靠低成本的存款，但中小型銀行則較多依賴成本較高的定期存款作為資金來源，融資壓力及資金成本壓力均不利中小型內銀淨利息收入表現。
故見七月以來資金流入內銀股，都係以四大內銀為主，班大戶唔大唔買都事必有因。不過，類似工商銀行（01398）第三季股價都升唔少，最終季度數據前的一周股價已開始回落，到底正式公布後股價係持續回吐抑或有反彈，好大程度視乎數據能否刺激有新資金流入。
國策股暫時要抖抖
內地十九大會議周二閉幕，一如預期都係平平淡淡咁完結，冇咩重大消息刺激。
臨近期指結算，加上本周美國公布經濟數據，港股氣氛觀望，周二恒指全日波幅介乎28,098至28,356點，埋單唔見150點，收報28,154點，主板成交899億元，睇吓靜到幾時又行個大單邊市出嚟。
本來仲諗住十九大會有一啲重要國策再重新講一次，點知都係冇。故見到呢幾日，啲國策股好似漏咗氣咁，典型的例子有比亞迪股份（01211），股價經已落番70元關附近，高位計都跌咗超過一成半了，照計係調整的話，應該跌得差唔多，否則可能要繼續抖一段時間。
醫藥板塊就繼續輪流炒，周二提及的復星醫藥（02196）、山東新華製藥（00719）、綠葉製藥（02186）、聯邦制藥（03933）及興科蓉醫藥（06833）都創過52周新高。不過，若然短期恒指真係失守28,000點，睇怕醫藥股都要回一回，大型醫藥企業中長線會經起考驗，但細晒士概念股短炒都係要睇情況見好識收。
港人始終信賴磚頭
古勝執筆期間，傳來有公屋以逾五球成交！看來市場消化了政府最新的房屋政策過後，明白短期供應依然不可能大增之下，還是有買家入場上車。
老實講，用幾百萬買層私家樓住，細啲都叫做自置私樓做業主，但幾百萬買間公屋，在下都唔知應該用咩心態看待，反正公屋戶可藉此免卻被趕或捱貴租，但打工仔一生人有幾多個幾百萬？花在一間公屋身上，未計利息上升供樓負擔將增加，有冇機會藉資產價格升值來向上跳到私樓市場，真係天曉得！
不妨買埋地產股
所以話，若然真係認為樓價冇得跌，古勝寧願買手持農地多的本地地產股，博佢資產價值得到釋放，未來可繼續提供穩定利息收入同股本增值，都唔傾向用筆錢買公屋。當然人各有志，在部分人心中揸磚頭永遠是最實在，冇樓住的話，公屋都照掃。
古勝