絲絲講場：誘Amazon建分部 奇招共賞

建城市起車站送總部

點解要爭？HQ2係肥肉，亞馬遜講明會投資超過50億美元，為當地帶來5萬個高薪職位（即是月薪6.5萬港元），規模預計同西雅圖總部差唔多。咁肯定會帶旺鄰近社區，帶來更多相關嘅工作機會同巨額嘅其他投資。

為爭亞馬遜點燈，各地方奇招盡出，包括「跟你姓」。好似喬治亞州Stonecrest市，就話會撥出345英畝土地去起個新城市，個名就叫「Amazon」，仲畀埋亞馬遜舵手貝索斯做新城市嘅終身市長。

大路啲嘅，就收少啲稅來打動你，新澤西州紐瓦克市話出70億美元稅務優惠。

最豪要數加州歐文市，當地超級富豪兼地產商Donald Bren代表該市去信貝索斯，話願意出晒地同錢興建，至少50億美元！

有啲就用玩具來引你，德薩斯州達拉斯市話可以起個子彈火車站畀HQ2，第時只係一個半鐘就去到休斯敦，聽講呢條子彈火車線值成150億美元，明年就開始興建！

今個禮拜四就截止申請，亞馬遜嘅選址條件包括：人口超過100萬以上嘅都會區，附近有便利公共交通同國際機場，最重要係可以請到最Top嘅科技人才，同Google撼過。邊度會跑出？明年開估。

余絲韻