Market Insight：食品相關股掀重估潮

誠如古勝昨日所講，港股真係等埋騰訊控股（00700）發力再破頂，騰訊股價以歷史新高355.6元收市，升1.8%，市值已達到3.37萬億元。由於騰訊分拆閱文股份的合資格享有保證配額股份最後交易日為今日，有眾安在綫（06060）案例在前，顯見騰訊強勢有因！

以蒙牛強弱做指標

唔知大家覺唔覺，年中以來內地食品飲料消費股表現明顯改善，最靚係隻乳業股蒙牛乳業（02319），唔經唔覺股價經已上番近22元水平，與一五年大時代價高位25.5元相差不遠。至於積弱幾年的康師傅（00322），股價亦由七月的9元水平升至12元樓上，統一企業（00220）股價由首季低位近5元水平，反覆升抵7.8元。就連極為弱勢，在努力築底的中國旺旺（00151）股價亦謀突破，近日試叩6元關。

今年以來內地經濟表現優於預期，是近季消費股表現脫弱勢的原因之一，相信亦同外資對內地經濟展望改善有關，到底重估潮完未，睇實隻強勢股蒙牛幾時掉頭，就會搵到啟示。

股市鑊氣未及大時代

除咗騰訊外，港交所（00388）及內銀股都未真正發力。事實上，恒指已突破一五年大時代高位，惟以周一收市價225.6元計，港交所現價距離大時代高位311.4元尚有一段距離，追落後係遲早問題。

靠中資金融股維穩

不過，別忘記港股成交仍未復大時代的水平，港交所股價落後亦非毫無原因，故炒落後還炒落後，都要有個譜，呢浪就先睇番二月高位233.2元。

內地十九大即將召開，聽聞北京呢幾日安檢十分嚴格，至於中港兩地股市，當然亦要高度維穩，中資金融股自然擔起維穩角色，昨日建設銀行（00939）及中國銀行（03988）同升逾1%。照計，本周都經已是十月中旬，班大戶唔爭在頂多個幾禮拜做埋個月結。但亦有唔少意見認為，十月高位係浪頂，接下來至明春股市將面臨調整。

古勝就傾向睇埋十一月，到底「侵侵」係咪訪華，若然屬實，中美關係的好與壞，將對資金流向有重要啟示。故也別太早評論是否過了十九大兩地股市就玩完，且邊走邊看。

聯想控股小注一試

睇周一成交都唔細，尤其係見到唔少靜咗好耐的板塊同細價股有異動，如光伏股同彩票股等，皆因由低位回升，且成交增加。一個真正的炒股大時代，不能獨看指數表現，還須看二、三線股活躍活躍。至少呢一刻，與全民皆股仍有大段距離。

若然閣下對後市好有信心，就不妨開始留意吓喺啲實力二、三線股中細細注播種的機會，反正佔組合比例唔多，坐得放心嗰種啦。

想發掘落後中資股，其實聯想控股（03396）都有得諗吓。圖表顯示，去年以來該股三次成功守穩底部支持，近日已成功突破今年次季所營造的降軌阻力。若呢浪成氣候，目標反覆上試24至25元，18元及主要支持。今年四月公司管理層話要搞金融業務，要在金領域形成一個大的「噸位」。咁大項目，照計唔憂消息，小注作中長線持有，呢啲位進可攻退可守。

古勝