絲絲講場：上市紀念品邊間最有Heart?

打頭陣嘅係高萌科技（08065）送上琉璃造嘅公雞雕像（圖2），寓意「金雞報喜」。公司公開發售部分超購1,068倍，上周暗盤同昨日都紅盤高開又高收，份禮勝在的確應景。

不忘Sell自家業務

永勤集團（08275）做番自己本行，送出一個工程泥夾嘅模型（圖4），一睇就知佢哋係地基工程商！

舍圖控股（08392）就上市不忘宣傳產品，送出嘅係自家品牌蠟燭臺、花樽同擺設（圖1），提醒你家居設計係幾咁重要。

同樣係Sell自己主要業務，眾誠能源（02337）就送出成個加油站……嘅迷你模型（圖5），都幾維肖維妙o架。

睇咗一大輪，咦，飛霓控股（08480）送出嘅金魚錫鑞牌匾（圖3）咁熟口熟面嘅？原來同七月上市、同樣來自馬來西亞嘅UTS Marketing Solution（06113）撞禮物，連題字都如出一轍！唔通份禮係馬來西亞特產？

撞禮物唔緊要，飛霓出動埋「周董」搶Fo！唔係講緊歌手周董周杰倫，而係港姐出身轉型從商、現時任職公關公司嘅周美鳳。

余絲韻