以庫克為首嘅蘋果公司（Apple Inc.）搵史匹堡幫拖？冇錯，就係荷里活大導嗰位史提芬史匹堡。
話說，Apple決心進軍原創電影及電視節目，打算翻拍史匹堡八十年代創作嘅經典科幻恐怖電視劇集《Amazing Stories》，實行要為未來一年揼本近10億美元（約78億港元）製作原創節目嘅計劃「省靚招牌」，史匹堡本人好大機會做新版本嘅監製添。
聽講Apple同史匹堡間Amblin Television及NBCUniversal嘅電視部門傾掂，會拍十集全新系列《Amazing Stories》，每集預算逾500萬美元（十集共約4億港元）。喺邊播幾時有得睇？未公布喎，不過睇新iPhone依家咁，Apple想推新嘢吸客怕且急過你。
條橋Work唔Work就未知，但唔好睇小套劇，當年播咗兩季就奪得五個艾美獎，鏡頭前後都星光熠熠，演員有奇雲高士拿，導演包括馬田史高西斯。套電視劇仲輯過做電影，喺香港上過，當年叫《幻海魔蹤》。你搭到嗲？套劇係八七年嘅事喎，閣下都有番咁上下……資歷！
余絲韻