閔書熙放射閃亮魅力

正所謂女大十八變,唔少南韓女生年紀輕輕已經投身模特兒行業,經過多年打拚後,由初出道嘅青澀氣質變成風采迷人,散發出濃烈嘅女人味,好似閔書熙正係其中一位。

棄醫投模

喺唔少人嘅印象中,讀得書叻嘅女仔總係唔多靚女,因此當出現一位既有學識又有樣貌嘅女生時,對男士嚟講極具吸引力,閔書熙就係一個好例子。喺嘉泉醫科學大學放射學系畢業嘅佢,讀書時係一位高材生,而且樣子可愛,加上調皮嘅性格,吸引唔少男生嘅目光。作為未來醫學界嘅一分子,點解書熙會選擇做模特兒?佢解釋因為放射學嘅課程比較沉悶,加上自己跳脫嘅性格好難不斷重複又重複嘅學習生活,所以極需要其他嘅生活體驗平衡一番,咁啱一位同學兼職做模特兒,於是喺對方嘅引薦下便膽粗粗走去試鏡,結果成功獲得取錄。

當時以攝影模特兒工作為主,之但係書熙平時唔多化妝,因而發生唔少(火羅)爆嘅事情,佢以為化妝係好簡單嘅事,點知有次佢自己化完妝後,竟然被攝影師要求佢即刻去美容室重新化過個妝。經過呢次事件後,佢決定好好學習化妝技巧,同時明白到模特兒工作有好多嘢需要學習。書熙憑住青澀嘅氣質同玲瓏浮凸嘅身材,好快便喺攝影模特兒界獲得相當嘅人氣,呢個時候事務所問佢有冇興趣轉做全職模特兒,經過一番考慮後佢便答應。

美艷發送

成為職業模特兒後嘅首個工作,就係喺一個電腦產品節上登場,初次喺公眾場合演出,令書熙非常緊張,幸好喺前輩帶領下,佢不但克服心理壓力,更憑住性感又可愛嘅造型,成功贏得大家嘅讚賞。之後佢以車模身份喺車展上為汽車品牌站台,又化身成賽車女郎喺江原道舉辦嘅農夫車賽事上,以破格嘅性感造型登場,結果引嚟極大嘅回響,從此佢便跟賽道結下不解之緣,經常喺各個南韓舉辦嘅賽車賽事上,都可以見到佢嘅身影。

喺模特兒界獲得極佳嘅成績,但係書熙一直想係咪以模特兒工作為自己嘅終身事業呢?須知道當時嘅佢仍未大學畢業,不過佢好快就搵到答案,事關佢發覺自己嘅性格跟沉悶嘅放射師工作實在格格不入,故此畢業之後決定繼續模特兒嘅事業,同時喺2010年參加首爾汽車沙龍模特兒大賽,希望透過呢個機會提升人氣。結果如佢所願,喺比賽中獲得最上鏡獎,人氣飆升。經過多年嚟喺模特兒界浸淫,書熙從當年嘅青澀少女,變成今時今日魅力四射兼女人味極濃嘅女性,呢個轉變足以令任何一位男士細味。

精彩推介

簡介:青春時期嘅閔書熙所散發出嚟嘅陽光味,固然吸引,而成熟期嘅佢充滿女人味,加上玲瓏浮凸嘅火辣身材,令人難以抗拒。究竟邊段時期嘅佢最為吸引呢?咁就要等大家自己慢慢品味一下喇!如果想了解阿妹多啲,就要Click入呢個網喇!

網址:http://cafe.daum.net/loveseohee-Holic

閔書熙Profile

出生地:首爾

身高:168cm

三圍:34-25-35

撰文:魂