絲絲講場：Apple驟變股市毒藥？
蘋果公司（Apple Inc.）有新產品例必帶挈相關概念股炒起，但今次唔止金手指失靈，仲變埋股市毒蘋果？！佢哋發布iPhone 8同iPhone X至今快滿一個月，iPhone 8銷情一般，連代工股嘅股價亦……睇睇隔籬個圖就見。
五隻代工股唔見191億
由九月十二日Apple發布會嗰日計起，香港五大iPhone代工股股價至今全線跌，輕則跌3至4%，重則跌逾兩成！五隻股份市值蒸發加埋超過191億元，計埋夠買193萬部售價9,888元嘅256GB iPhone X！
不過相比起來，Apple金手指失靈對台灣股市影響仲甘。台股之前受出新iPhone憧憬帶動，今年創出過27年新高，點知上月真正發布新品後，台股就跌。有分析師話iPhone 8銷情唔及前兩代，iPhone X產能又未必能應付初期市場需求，所以預計台股年底前都難再創新高咁話。
調查仲發現，一半受訪分析師認為，台股第四季最大風險係地緣政治同埋新iPhone銷情失望。新iPhone賣得差對股市嘅風險，拍得住北韓與美國擦槍走火？！iPhone X月尾就開賣，又睇過點！
余絲韻