絲絲講場：經濟諾獎得主塞勒貼地搵銀
新鮮出爐諾貝爾經濟學獎得主塞勒（Richard Thaler），原來好「貼地」。佢嘅研究並非限於學術上，而係真賺到錢！佢仲拍過戲，出過暢銷書！
搞芬拍戲兼寫書
塞勒係Fuller & Thaler資產管理公司嘅「話事人」，佢將自己套理論加以實踐，為資產規模58億美元嘅Undiscovered Managers Behavioral Value Fund基金提供意見。
成績點？基金回報○九年三月牛市開始以來累飆512%，成功跑贏標指同期升幅近一倍。雖然單睇今年，隻基金升約8%，落後同期羅素2000指數嘅近11.5%與標指嘅近14%升幅。不過，塞勒另一隻基金Fuller & Thaler Behavioral Small-Cap Equity Fund今年以來就累升14.7%，成功跑贏兩隻基準指數。
塞勒講過，佢對行為經濟學嘅研究，幫到發掘有反彈迹象嘅低殘股票，其中一個信號就係當出現「內幕交易」時，尤其係當有財務總監突然增持股票，就係時候要睇睇！
不過令人意外嘅係，塞勒無揸個別股票，佢反而寧願相信基金經理！佢就話，人最錯就係過分自信，仲建議啲自以為睇市好準嘅人，唔該記錄低自己嘅投資回報，睇真啲。
其實，你可能亦見過塞勒，佢喺電影《沽注一擲》（The Big Short）客串出過鏡，就係向賽琳娜戈梅茲（Selena Gomez）解釋乜嘢係「Hot Hand Phallacy」（「熱手謬誤」也，乜來？睇戲吧）嗰位大叔。除咗經濟，呢位大叔仲好鍾意打高爾夫球同飲葡萄酒。
話時話，佢嘅大作你亦可能睇過，佢合著嘅暢銷書《Nudge：Improving Decisions about Health, Wealth, and Happiness》，包你睇得明，信絲絲。
余絲韻