絲絲講場：大時代想贏大師醒你4招

走貨定追貨好？為怕墮入迷離境界，嗱以下神級投資者4大秘訣，袋住傍身，閣下應該點都摸到路返屋企。不妨Send埋畀你左右隔籬啲羔羊。

彼得‧林治：肯認錯止蝕

富達投資前基金經理彼得‧林治（Peter Lynch）話唔止蝕嘅失敗者係咁諗嘢嘅，有冇你份？

•股價跌到咁，無可能再跌，肯定已見底

•股價得幾仙，仲可以蝕幾多吖？抵買啦！

•最終股價會返家鄉嘅

•等股價反彈到xx元我先賣

索羅斯：多個渠道收風

國際金融大鱷索羅斯每日要睇十數份各類專業刊物，佢投資涉足樓市、農業、網絡公司、壽險公司、金融商品、超級市場等各種不同領域，全部都係佢親自了解，唔係靠聽人講。除咗閱讀，佢每日仲會用三分一時間思考同資料搜集。

鄧普頓：大膽逆向思維

鄧普頓資產管理嘅創辦人約翰‧鄧普頓（John Templeton）係逆向思維人辦，一九三九年大蕭條與戰爭嘅雙重恐怖氣氛下，佢反而大膽借1萬美元，買入當時紐交所每隻股價低於1美元嘅股份，總共買咗104隻股份，每隻各100股。結果二次大戰結束後，佢呢個投資組合勁賺N倍！

巴菲特：忌蝕錢 預長揸

投資首要係乜？賺錢？No，股神巴菲特話，「第一條法則：唔好蝕錢；第二條法則：永遠記住第一條法則。」

巴菲特係長線投資者，佢講過：「我從無諗住入貨第二日就賺錢，我買股票時，總會先假設第二日交易所會關門，等五年後先恢復交易……任何股票，如果無把握能長揸十年的話，咁連10分鐘都唔使去考慮買唔買嘞。」

余絲韻