「翠如BB股」聯旺集團（08217）同中國集成（01027）都係今年六月底細價股股災嘅重災區，上市委員會尋日就因為中國環保能源投資（00986）涉違反規則下買賣兩間公司股份，「的」個主席同執行董事上堂學做董事。
中國環保能源投資舊年七月廿日斥逾1.24億元買聯旺，七月廿日同廿一日共出售中國集成套現超過1.76億元。上市委員會話，交易並唔係一般及日常業務，而係主要交易，公司冇遵守《上市規則》入面，主要交易條款確認後，要盡快通知聯交所、出通告、刊發通函、事先取得股東批准嘅規定。委員會仲有其他批評，恕絲絲未能在此盡錄，總之一句講晒，離晒譜！
戲肉嚟嘞！聯交所上市科調查發現，原來陳彤（主席兼行政總裁）、項亮（執董）過去兩年冇接受過任何有關《上市規則》第十四章嘅正式培訓，頒令陳彤同項亮九十日內搵特許秘書公會、董事學會或其他上市部認可嘅機構，接受關於《上市規則》合規事宜及董事職責嘅培訓24小時；完成後公司仲要喺兩個星期出通告確認，話畀大家知︰「我畢業啦！」
余絲韻