絲絲講場：361度股東掟貨出事 回購補鑊
世事如棋局局新，一間上市公司主要股東周四齊齊沽貨1.5億股，套現5.62億元，配售價每股3.75元，消息傳出後，股價周四急插逾21%，公司翌日已急急補鑊，宣布擬以內部財務資源回購股份，但小股東驚魂未定，周五收3.43元，仍低於配售價3.75元。
今次主角係上市公司361度（01361），沽貨嘅主要股東包括丁氏家族成員，沽售股份相當於現有股本約7.25%，都唔係小數目，而且配售價較周三收市價4.34元折讓約13.6%，雖然361度周五獲通知，配售協議要求賣方股東於配售完成日起180日內承諾不再減持，但呢招似對股價支持有限。361度周五收市價較周三已累跌逾兩成，都咪話唔傷。
絲絲話齋，主要股東如果睇好公司前景，就唔會大折讓沽貨。股價插水，公司反而以內部資源回購股份嚟支持股價，做法令人好難明，睇嚟公司未來股價仲會波動。
余絲韻