期指結算日，尾市大戶鳥獸散，大市愈隊愈低，埋單跌220點收報27,421點，期指更大低水138點。下星期A股放長假，莫非無大媽撐場，兩萬八點高位係咁先？
塘邊鶴成日話港股逢七必跌，十月適逢傳統股災月，昨尾市好似要錢唔要貨咁，挾着近400倍超購的眾安在綫（06060）隊到近低位，埋單升幅唔夠一成。股王騰訊（00700）下晝兩點開始由升變跌，落到U盤被嘜至全日最低位333元收市。
今日基金季結，加上A股將進入長假期，個市斷估會開始靜。展望十月，聯儲局開始縮表，月中十九大，而「侵侵」稅改醜婦終要見家翁，要趕今年內通過須趕喺月內呈上國會，都可能左右港股後市。事實上，八連升的恒指要斷纜，停低抖抖亦屬正常，十月保守番些少並非壞事。
今年個市累積升幅唔少，進入高位牛皮階段，有相當誘因公司趁機伸手甚至股東直接套現，網龍（00777）批股之後，昨日361度（01361）股東減持，每股作價3.75元較周三收市價折讓13.59%，套現5.64億元。昨日第一口價開3.76元，已是全日高位，之後再無戲唱股價free fall，最終跌21.6%報3.4元，意味接貨的統統要揩。對短期大市並非吉兆，要小心高財務槓桿的內房股會加入抽水行列。
大行睇好同睇淡一隻股票，隨時搵到千百個理由。政府施政報告十月出籠，之前通街唱政府會加快農地轉換，惟當美國話縮表兼年底加息，地產股掉轉頭炒落，又見大行用同一個理由自圓其說。德銀昨將恒基地產（00012）評級由持有轉至沽售，理由係市場對施政報告以至農地轉換的過程太樂觀，認為把價值浮現需時，新目標價47.9元，較昨日收市價再低7.5%。
恒地股價今年由36元起步升到最高55.95元，跌番一半大約係46元，聯儲局堅持今年仲要加息一次已經出乎市場估計，加埋十月縮表，息口敏感股都係先減一減磅為宜。
古勝