絲絲講場：High爆撐眾安李小加嗌人剝衫
香港交易所（00388）行政總裁李小加尋日因乜解究亢奮到叫人除衫呢？！
話說港交所頻頻提改革，希望吸引更多新經濟概念股來港上市，尋日有互聯網保險科技公司眾安在綫（06060）喺主板掛牌，凍資超過2,300億元，李小加撐場兼大讚「新經濟新未來」，佢仲一隻腳踩上台叫眾安高管們「脫吧」！
全公司着T恤Sell Young
眾安成班高層隨即除低西裝褸，露出入面件印住公司口號嘅T恤！眾安首席執行官陳勁台上致詞時，當面感謝李小加准佢哋「脫去了僅有的西裝」，話聯交所尊重互聯網公司文化咁話添。
絲絲見眾安由上至下連公關都着晒公司口號T恤，大飲文青咖啡「% Arabica」，明顯Sell年輕創新科技公司Feel。但佢哋送畀港交所嘅紀念品，竟然係一幅由書法大師王齊樂教授揮毫嘅題字「先知先見先行」（聽講係眾安成立之初嘅標語），估唔到佢哋骨子裏咁傳統！
股價升9% 每手帳賺$550
眾安股價尋日高開69元，之後飆升至70.5元，收市報65.2元，比招股價仍高出9.2%，帶挈Fans首日每手帳賺550元。
余絲韻