絲絲講場：鱷王索羅斯變恐怖分子？

話說八月二十日有個署名「E.B.」者，喺白宮附屬網站「我們人民」（We the People）發起聯署，要求美國司法部認定一名叫「George Soros」嘅人及旗下職員係恐怖分子，並充公佢所有資產，理由係「George Soros」資助組織，試圖以恐怖手段破壞美國穩定，顛覆國家政權！

白宮聯署速獲7萬簽名

原文極之累贅，連美國都寫錯做「United State」（應該要眾數），而且所謂「George Soros」亦冇講明就係金融大鱷嗰個索羅斯，但聯署到周五居然已收集到超過7萬個簽名，睇嚟網民自動幫佢對號入座！

按慣例，「我們人民」上面嘅聯署發起三十日內收到10萬簽名，白宮就要回應，距離限期（九月十九日）仲有大半個月，過10萬大關睇怕難度唔大。

戲肉嚟嘞，一直力撐民主黨嘅索羅斯，曾經喺特朗普宣誓就任美國總統前夕鬧爆特朗普係「騙子」、「譁眾取寵」，批死佢失敗收場。「侵侵」掌權嘅白宮到時會點呢？小二，花生兩客唔該！

余絲韻