孖妹S檔案：銀行股夠力返家鄉？
孖妹本以為個市可以升到28,000點。咸豐年前高位買入銀行股嘅魚缸股友，亦諗住啲蟹貨可以浮番上面，點知兩位狂人開火嘅言論，搞到大家要錢唔要貨，大市就震穿27,000點。究竟股友們幾時先守得雲開見月明呢？一向靠高息撐住嘅銀行股，係咪較堅挺？一於搵專家測測「錢路」先！
內銀篇：盈利難勁飆 吼科網好過
梁：渣打香港財富管理投資策略主管 梁振輝
彩兒：港股因為北韓同美國政局緊張，搞到上星期中後段急插，我同Kitty都心郁郁想撈貨。
梁：其實我覺得喺大跌市入面，係可以尋求買貨機會嘅，但千祈唔好心急，皆因恒指已失守27,000點，有機會下試50日線，即係26,344點。雖然內銀股已經喺上周尾段跌咗唔少，但仍未係好嘅買入時機，若然係想博反彈，都係搵國際銀行股，同埋跌得深嘅科技股好啲。
息率倘不錯 可續揸
Kitty：啲銀行股早前升得好Sharp喎，咁撈內銀股好唔好呢？
梁：我對H股有正面睇法，同埋都覺得銀行股仲有力再升一浸o架，不過，佢哋唔會係領頭羊囉，皆因佢哋之前已經累升咗一大輪喇……嗱，如果要估計內銀股之後會點行，我諗，嚟緊嘅盈利收入將會充分展現後市去向，點行點走就要睇佢哋造化喇，業績有驚喜就當然會成為刺激股價嘅催化劑啦！如果盈利係穩步向上嘅話，相信股價升勢可以持續，但係，相對其他板塊嚟講，升幅就會有限喇，你懂的……
梁：若然係講環球性嘅話，站在宏觀環境，我哋係鍾意銀行股o架，但係內銀股就差啲催化劑，例如，盈利大幅進步嘅空間、公司回購嘅機會，同埋增加派息等等。
Kitty：我有個Auntie揸緊內銀股嘅「千年蟹貨」，係○七年買入嘅工商銀行（01398），摸頂約7元買入o架，佢呢排發晒癲咁望佢返家鄉，我真係驚唔成事嘅話，佢會癡……啊！
梁：都唔算「千年」啦……我哋集中去睇內銀盈利增長同股息率吖，內銀股喺盈利支持下，股價應該被推升多啲，但你咪妄想佢做到領漲嗰個囉，不如諗諗轉去有健康增長嘅板塊，好似科技股咁，會係比較好嘅長線策略；不過，若然繼續持有，收一個唔錯嘅息率，都冇壞嘅……
股價潛在升幅有限
彩兒：都揸咗咁耐，揸開有感情嘛，邊度會轉頭就咁狠心割蓆喎，你太唔了解女人嘅心態。
Kitty：女人心，海底針；散戶心，最癡心啊！
梁：等我諗諗先！用股息Cover股價虧損就難啲喇，但睇怕持貨者依家都唔會沽o架喇……受惠於經濟前景改善，資產質素、手續費收入都有望提升，對比起其他板塊，內銀股都有追落後嘅概念。不過，衰在佢哋盈利潛在升幅同埋股價升幅都有限，而且會受到國策不明朗因素同人仔前景影響，所以同內銀股談戀愛嘅股友就要睇路喇！
國際銀行篇：滙控與渣打 炒法大不同
植：耀才證券研究部總監 植耀輝
彩兒：究竟你係咪收到金正恩通風報信先，竟然識得喺騰訊控股（00700）330元樓上減持，有冇咁堅啊！個倉多番啲Cash，個市又咁Chok，會唔會手痕想買番啲「穩健貨」平衡番心理？
植：嘩，乜咁睇得起我！查實呢批騰訊貨，係英國脫歐公投前後開始儲落o架喇，首注係約160元，買到最後一注係喺佢旗下隻《王者榮耀》被內地官媒狠批嗰陣，上星期見到330元，覺得近期升勢急，呢個水位應該減減磅，不過若然佢本周公布業績後股價OK，我就會再追。
滙控75元樓下收集
植：我都有（目及）住隻舊經濟股王滙豐控股（00005），有機會嘅話會買入，皆因睇佢近期公布份成績表，佢收入有上升，而且算有驚喜，睇呢隻「五號仔」要睇兩方面，首先就係開源節流，佢係做到「節流」嘅，但係就做唔到「開源」，佢已經係巨無霸，想再收購公司谷大自己係難事，由於有併購觸礁嘅前科，令管理層做併購有戒心，即使有新收購目標都好啦，可能都要等新管理層上任先會做；所以錢多咪惟有回購股份或者派吓高息。
「五號仔」回購股份當然對股價有幫助，環球嚟緊都會進入加息周期，預計美國一年可以加2至3次息，所以對佢淨息差都有幫助，睇番近期股價有超過5厘股息率，都幾唔錯。
Kitty：「五號仔」喺六月底至今，即使上周受大市拖累都好，亦累升唔少，若然持有100蚊樓上貨、做咗「大閘蟹」多年嘅股友，見到鬆綁曙光未？
植：佢哋呢幾年收息都Cover到部分帳面虧損啦，甚至乎若然係以股代息的話，個回報效應都幾好。股友去到呢啲位，當然會寄望佢再升上去，甚至係重投「紅底股」行列啦，呢一轉又唔好咁高期望住，85元呢啲位應該差唔多，主因佢估值同未來發展都面對變數，近期股價回軟，撇除受大市拖累嘅原因，主要受美國加息步伐放緩所影響，不過長線揸住嚟收息就冇死嘅，除非爆出環球金融危機，否則再大跌機會微，未有貨者可以喺75元樓下收集。
渣打憧憬觸底反彈
植：值得留意嘅係，佢同渣打集團（02888）嘅貸款減值撥備都大幅減少，而且隨住被美國政府罰款進入尾聲，再者，佢極受北水歡迎，近期北水持貨佔已發行股份超過4%，脫歐程序好漫長，始終佢係國際銀行，相信最終對佢影響冇市場預期咁大。渣打就好唔同，炒緊觸底反彈概念，假設下半年環球經濟好轉，佢股價有望做好啲，但又唔好太高期望住，公司業務只係啱啱開始好番，對資金有需求，所以千祈咪憧憬佢派息喇。
Kitty、彩兒
若有料報畀彩兒同Kitty或有嘢問，可電郵money.biz@on.cc