近年，港股接二連三發生了好幾次的大龍鳳。好似前陣子，兩間沽空機構於瑞聲科技（02018）的戰場上互相私片，監管機構就有如散戶一樣，食住花生等睇戲，卻一言不發；再到了六月底，俗稱「粉塵爆炸」的細價股股災，就釀成了多家股份於一日內暴瀉八、九成，散戶們血流成河，到依家已經不了了之。
難得係，崇尚無為的港交所（00388）行政總裁李小加，仲頌讚話沽空能「幫忙發掘個股的價值」喎，真係多謝晒！
李小加語驚四座已不是第一次，他的「證監會先係大老闆」論更係深入民心，未知「大老闆」是否下達了命令，要「二老闆」洗一洗港股的太平地呢？
近期港交所終於都做番場好戲喇，對長期入不敷支，以至業務出現淨虧損，現金流持續減少，而且不具備於短期內大幅改善的公司加強監管。
事實上，長期半生不死的公司於主板有大把，創業板更加多不勝數啦！他們死命地保留住上市的低位（方便賣殼）從來都是無所不用其極的，一時買吓資產、買吓礦、又扮轉型，再衰一些的，就玩吓財技集吓資，可說是市場裏的計時炸彈。
難為一些為博上位，不顧道德、責任的人一次又一次地推班散戶去死，真係睇到我眼火都爆！聯交所的決定無疑是為了好多欠缺經驗的散戶拆彈，同為好多專推妖股的組群卸裝。計我話：真係大快人心！
如今一個虎穴被堵住了，可說是殺一儆百。而我相信只要先例一開，往後還陸續有來。我不排除此舉會觸發市場內的游資加快逃離一眾殼股同細價股，並重返大盤股，有利於指數推升，這對任何人來說都是好事。
富昌金融研究部總監 譚朗蔚（作者為註冊持牌人士）