絲絲講場：華爾街「日全食」預示美股見頂？

天文影響升跌有數得計

股市升跌關天文現象事，有冇咁玄？就咁嘅，○一年加州大學、倫敦大學經濟學院及澳洲國家大學聯合研究顯示，接近「月圓」幾日股市表現，較「新月」嗰幾日差。

另一份美國加州大學與密歇根大學○一年聯合研究亦顯示，證券交易所所在城市晴天當日，股市表現較好。仲有，加拿大約克大學、多倫多大學及卑詩大學一份○○年研究亦話，秋天及冬天嘅日照時間會影響股市表現！

至於「日全食」又點？美國投資通訊及專欄作家Mark Hulbert統計過，自一九○○年以來，美股平均喺出現「日全食」後10個月先見底或見頂；若以統計學嘅「標準差」（Standard Deviation，概率統計中常用作測量一組數值嘅離散程度，想知多啲就上網查）嚟睇，平均6.6個月後股市轉勢。

Hulbert結論係，若最最最保守咁睇，美股會喺「日全食」後23個月內見頂。

又10個月，又6.6個月，仲去到23個月？！就算個市兩年後轉勢，真係唔知點話關兩年前嘅「日全食」事！連Hulbert都話，講咗等於無講。

另一位結合技術分析與占星嘅華爾街「大師」Arch Crawford就點出，○八年八月一日俄羅斯出現「日全食」，六日後俄羅斯就同格魯吉亞打仗，所以佢睇今次「日全食」後美股今夏會有幾波調整，今年底到明年初會再勁升咁話。信不信由你！

余絲韻