Market Insight:四大內銀實力之選

踏入「立秋」之日,港股高收作結!水泥股氣氛唔錯,皆因華潤水泥(01313)派成績表,受惠於產品平均價格上升及匯兌收益,中期純利增長逾五倍,昨日股價創下一五年五月以來新高4.98元。老實講,呢啲價已頗大程度反映了業績因素,照計呢浪最多上到5.2元水平要停一停,若然冇貨喺手,最好等回調先至再諗。

中國建材(03323)早前都就上半年業績發盈喜,預計淨利潤按年大增,昨收報5.1元,升8.97%,成交顯著增加。點解?睇見龍頭水泥股份業績咁靚仔股價累升咁多,醒目錢更係發掘落後股博追上,就如中建材,現價與三月高位5.94元仲有好一段距離,難怪能夠起哄而上!睇勢呢轉有力一試5.4元水平,回吐初步支持可參考周一平均成交價4.98元。

針對業績股,古勝都睇緊幾隻內銀股。事實上,上半年內地經濟情況穩定,內房泡沫受控,內銀的基本因素有改善,加上普遍有高息,現價長揸短打都諗得過。四大行之中,工行(01398)同建行(00939)係人氣之選;至於中行(03988)與農業銀行(01288),則以中行秤先。

吉汽抖夠 隨時爆上

恒指見逾兩年收市新高,又係靠騰訊控股(00700)發圍,喺兩家投行發功唱好之下,騰訊股價昨日曾高見321.4元新高,真係升市莫估頂!見國指表現都唔輸蝕,繼續企穩喺11,000點樓上,水泥、金融、鋼鐵等股份都有好表現,炒家都唔愁冇跟進目標。

上周五異動的本地地產股要抖吓氣,內房股亦進行整固,惟汽車股個別有好表現,其中華晨中國(01114)在一眾投行發功下,股價一度衝過上22.3元,收報21.2元,升2%,市值已達到1,069億元。收市後傳來吉利汽車(00175)公布七月份銷售數據,月銷9.11萬輛,按年升88%,按月升3%,首七個月銷量按年增長89%,達全年銷售目標的57%。

基本上,銷售表現在預定軌道內發展。吉汽股價微升0.11%,收報18.54元。

睇番走勢,吉汽在首季見高位後,調整個多月又再破頂;到六月見高位後,調整兩周又再發力創新高;今浪在七月中旬見高位19.16元後,調整已近月,能否藉銷售數據消息,股價再破頂延續神話,好快有答案。

中金長遠發展看俏

從事經營不良資產、投資、資產管理及金融服務業務的中國信達(01359)近月股價亦現強勢,由七月初2.8元水平反覆升抵周一高位見3.52元,維持自去年首季以來一浪高於一浪的走勢,惟觀其14日RSI,短線有回吐不出奇,不妨先留意3.2至3.3元區域承接,守得住的話,有力試攻3.6至3.8元區域。

分注入市持中長線

不過,論中資金融股,在下都幾鍾意中金公司(03908),股價自六月開始發力,由11元水平升至近日高位13.6元。由於呢隻股係喺一五年A股爆煲後先至掛牌,所以冇大時代股價可以參考。之不過,論估值呢隻股唔係貴,若然睇好內地金融業發展,尤其是證券及投資銀行業,呢隻股業務夠專,絕對係實力之選。

若然有點畏高,就分兩至三注入市作中長線持有。展望內地金融業去垢除污過後,長遠發展變得更穩健,加上明年A股入摩,此股有望受惠於行業發展,可望成大器。

古勝