絲絲講場：庫克三億花紅叫緊胡

話說上周公布嘅第三財季業績亮麗，帶挈Apple股價闖過上新高，如果呢股強勢延續至本月廿四日，庫克就可以袋走本財年與表現掛鈎股票獎賞嘅最高「派彩」──28萬股Apple股份，現值近4,400萬美元（約三億港元），但有乜「依郁」就可能會冇咗一大截。

睇股東回報 24日揭盅

按呢套獎賞制度，只要Apple過去三年嘅總股東回報，喺標指成分股中屬最高嗰三分之一（即是跑贏其他三分二標指成分股），庫克就可以攞到最高獎賞；但如果回報表現只係屬於中間嗰級，「派彩」就會減半；如果差到最底嗰級（即是跑輸其他三分之二標指成分股），就一蚊都冇；條數於本月廿四日埋單。

睇番上周二初嘅時候，Apple嘅回報係56%，徘徊最高同中間嗰級嘅分界線，但上周三股價喺業績帶動下急攀至逼近160美元最高位，全額獎賞頓時幾乎成為庫克囊中物，之不過股價嘅嘢好難講。話時話，由於庫克承諾捐出大部分身家，故此最開心嘅應該係一眾慈善團體。

余絲韻