騰訊控股（00700）隻《王者榮耀》近日可謂多災多難，一度拖累埋呢隻股王股價，無他嘅，槍打出頭鳥。不過，股王點只得呢個Game，佢旗下另一隻Game《英雄聯盟》（League of Legends，簡稱LoL）撈得風生水起，近日殺入埋香港電競音樂節，喺紅館搞咗個世界大賽，門票最貴仲480蚊一張，即係單睇人打機都要成五舊。
細個時總係爭住打機，邊有爭住睇人打機！但世代變矣，睇人打機今時都有市場，電競產業潛力之大毋庸小覷，吸引唔少後生仔「入行」全職打機，真非一般老坑所能想像。
話說回頭，騰訊早喺○八年已獨具慧眼入股LoL嘅開發商Riot Games，一一年仲加碼用逾2.3億美金增持，股權增至92.78%，喺一五年索性全資收購埋添。比起用天價86億美元收購另一遊戲開發商Supercell，好似抵到爛。
有分析就話，LoL去年收入近20億美元，孰真孰假無人知曉，但至少打機可以賺大錢兼股價連創新高呢個神話，無論對騰訊定小股東而言，已經係另一種「LOL」（Laugh Out Loud）。
余絲韻