絲絲講場：港產打工仔做足62年入健力士
打份工都可以打到入健力士世界紀錄——聽到都「O晒嘴」？不過真係有人做到！佢就係做咗保險代理超過62年、今年91歲嘅孫永祚（Joe），喺今年七月成功榮登健力士世界紀錄嘅「最長職業生涯的企業銷售人員」！
話說阿Joe後生嗰陣喺上海修讀經濟學，畢業後執教幾年，之後南下來港並投身保險業。阿Joe自一九五四年入行後，就一直喺宏利香港擔任保險代理，咁多年都冇轉過工，不經不覺成為宏利年資最長嘅人壽保險代理。
91歲保險代理未言休
今年阿Joe再下一城，衝出香港問鼎國際，於七月正式榮獲健力士世界紀錄稱號，成為「最長職業生涯的企業銷售人員」，並於昨日獲頒官方證書。究竟現年91歲嘅阿Joe喺宏利香港做咗幾耐？詳細答案係長達62年又238日！你以為佢就快退休？錯喇，原來阿Joe目前仲繼續服務客戶！
打工打到破世界紀錄，阿Joe又有咩感言呢？佢話，保險代理人係自己嘅終身職業，喺過去60幾年入面每刻都樂在其中，並冇退休打算；佢仲勸勉大家，無論工作或做人都好，永遠向前望同保持一份熱誠最為重要！
其實宏利香港唔少代理都相當長情，好似同阿Joe共事多年嘅同事兼朋友洪大德就服務長達56年，另一位老友韋力生都服務長達49年，認真唔嘢小！
余絲韻