絲絲講場：Uber創辦人放風強勢回歸

卡蘭尼克自比喬布斯

佢仲自比為會好似Apple教主喬布斯當年光榮重返公司咁！講起Apple已故教主喬布斯就有一段古，當年佢被踢出局後，公司冇耐就出現危機，結果教主臨危受命重返公司，之後仲推出咗iPhone同iPad一件又一件經典產品。

至於卡蘭尼克又有冇得光榮回歸Uber仍係未知之數，不過聽講佢當日辭職消息傳出後，當時有超過1,000名Uber員工發聯署信畀董事局，要求卡蘭尼克留低咁話。

真係有咁多粉絲撐？唔知呢，但當時涉及佢公司嘅麻煩事一單接一單，由性別歧視、性騷擾、強姦樣樣齊。所以今次搵新CEO好似諗過嗰位女性人選，就係惠普企業CEO惠特曼，但聽講人哋已表明無意做。雖然搵唔到惠特曼做Uber「女車長」，但董事局話會銳意改變公司嘅男權文化，仲話會加多啲女性入董事局同管理層。

可能卡蘭尼克對於自己一手一腳湊大嘅「親生仔」念念不忘，有消息就話佢已經取消休假，「上番車」繼續處理Uber嘅日常運作。至於佢能否真係「爆冷」強勢回歸？又睇吓點。

余絲韻