Market Insight：友邦等待回吐上車

同班芬佬講開，大家都樂見兩隻國際金融股滙控同友邦齊齊發力，點解？皆因唔少基金因為騰訊佔比爆升咗而唔能夠再大手增持，騰訊再升都變相享受唔到更多的升幅，難得有其他重磅股發力，咁基金表現就唔使受騰訊持股限制所局限而跑輸大市。

再講，友邦的中港兩地新業務增長亮麗，確實值得一讚，唔少大行已相繼調升其目標價，其中里昂睇70元，中金同大和睇75元，德銀睇75.8元。咁講法，有貨真係要揸到實唔好放，未有貨，就惟有睇吓短線回吐仲有冇機會喺60元邊上到車。

至於大笨象，回購計劃在市場預期之內，反而次季稅前盈利增幅表現則勝預期，乃驚喜所在。投行普遍好Buy呢份業績，其中大摩就叫人繼續增持，目標價睇84元。古勝就相信，中線大笨象股價再升多10元8塊並唔出奇，有貨就坐定定唔好炒出炒入，免得個人亂咗方向又或者買唔番；若未有貨但又想買，短線80元大關前點都有浸反覆先能一舉突破，合埋雙眼上車就係，驚就分兩注入，博第三季繼續財息兼收。

恒指見兩萬八不是夢

屈指一算，七月份恒指升約6%或1,559點，成就「七連升」﹗睇恒指走勢，騰訊突破300元大關後如入無人之境；大笨象績佳兼回購利好，股價未升完；友邦中港兩地業績增長勁，股價都未見頂；中國移動（00941）尚未發力、內銀及內險業績應該偏向好消息居多。咁計落恒指八月份要見28,000點，其實又唔係真係幾有難度。

有指能左右大好形勢，乃地緣政治因素，但呢個因素冇得預測，而睇近日北韓再次試射導彈，相信美國有怒氣但冇勇氣輕率動武。

逆勢做淡制唔過

同時，中國又高調展示軍事實力，睇嚟喺地緣政治因素方面，大家都抱靠嚇居多，抱着敵不動、我不動的心態，純粹出口術，對環球股市影響不大，倒不如化干戈為玉帛，搞好經濟。所以話，喺有新的重大利淡因素出現前，都係順着風向走，別急於開淡倉。

鋼鐵股唔大唔買

除咗業績消息，昨日亦見兩地有色金屬股起舞，其中鋼鐵股係威係勢，最落後的重慶鋼鐵（01053）急升13%，收報1.2元，算係次季初股價急跌以來最強的一支陽燭。馬鞍山鋼鐵（00323）升7.98%，鞍鋼股份（00347）升5.49%，人氣都幾唔錯。

板塊起動，主要係盈喜消息帶動重估潮。另一點值得關注的，乃繼中國恒天集團和中國機械工業集團整合、以及中國神華集團與國電電力整合，下一個整合的目標行業，可能係鋼鐵業。若然想押注央企重組概念，當然係唔大唔買，鞍鋼同馬鋼都係實力之選；至於重鋼，債務重整未知成敗，都係迴避為妙，千祈咪貪平。

講開又講，在下睇好的中國神華（01088）亦喺盈喜帶動下，昨股價高開見19.22元，全日高位見19.58元，收報19.46元，升3.7%。睇煤價走勢，今年神華業績將優於市場預期，重估動力仍在，再加上績佳有機會派發特別股息，有貨都係繼續坐順風車，20元關前的反覆可以視為最後召集，一旦確認突破，好快踢上24至25元。

古勝