絲絲講場：貝索斯嘅家訓竟然係……
亞馬遜創辦人兼CEO貝索斯上周四曾一度超越微軟創辦人蓋茨，成為全球新首富，儘管佢身家仍與蓋茨不分高下，但足以證明新時代嘅誕生。隨時係新時代霸主嘅佢，原來有句家訓「善良比聰明更重要」，源於佢一趟銘記在心嘅教訓。
話說佢細個時，每年暑假都會喺祖父母嘅牧場度過，佢好黐祖父母，祖父母仲會揸架旅行車帶埋佢喺美、加穿州過省去旅行，佢簡直視祖父母係偶像。
善良比聰明重要
有日，祖父駕駛旅行車，佢就如常喺後座碌來碌去。見祖母點起支煙，佢於是伸個頭去前座，拍拍祖母膊頭，懶叻咁對祖母講：「以你每兩分鐘吸一口煙計，我睇你就短咗九年命！」
十歲人仔，憑記憶中有關吸煙嘅數據去推算出死亡率，當時連佢都覺得自己醒，諗住等人讚。點知，全車靜晒，只有祖母嘅哭聲。
祖父將車停在路旁，貝索斯跟祖父落車行埋一邊。從來冇鬧過佢嘅祖父，靜靜講咗句：「有一日你會明白，善良比聰明更難。」
今時今日嘅貝索斯話：「聰明係一種天賦，而善良係一種選擇，難嘅係選擇。到埋單時，人生就係自己做過嘅一連串選擇。」
你寧願倚高材去玩世？定選擇做個善良嘅人？
余絲韻