Market Insight：手機設備股重新落鑊

指數冇咩睇頭，股仔爆煲潮過後又冇得炒，大小戶惟有例牌湧去幾個主打板塊內搵食，昨日就輪到手機設備股！其中龍頭股瑞聲科技（02018）終於走出「做空」陰霾，股價破頂，高見117.6元，小股東樂見雨過天青。

私募基金恃住錢多

不過，論走勢，更火爆的係受盈喜消息刺激的舜宇光學（02382）。其股價由周一收市價79.1元，升到上昨日高位見93.05元，收報92.45元，升16.88%，市值已突破一千億元大關，真係當股仔咁炒，睇個勢，舜宇唔使幾耐可以炒上紅底價。

由於百麗國際（01880）即將退市，舜宇絕對有條件問鼎藍籌寶座，所以話，都係咪急於估頂。

其實，早前的吉利汽車（00175）、瑞聲，如今的舜宇，聽聞炒起的都唔係本地基金，而係內地基金，佢哋都有一項共同優勢，就係「錢多」，本地同老外芬佬都要行埋一邊。

古勝相信，一隻股到底值幾多，超買定超賣，最終股價都會作出修正。可是，內地啲基金，尤其係嗰批投資冇咩嚴格準則、但勝在錢多的私募基金，唔理隻股夠唔夠秤，單刁有幾高風險，總之炒到歸邊佢玩晒就係。如果冇膽參與呢類狂野派對，就惟有睇人發達。

央企改革似靜極思動

講到手機設備板塊，其實近年疊水基金係輪流炒起汽車、手機設備同濠賭股板塊，而次選板塊則為大型內房股。理論上，昨日手機設備股才剛剛起步，應該仲有得玩吓，汽車股就調整。吉汽每手股數拆細昨日生效，股價便回吐2.8%。時值暑假，又係旅遊高峰期，不妨睇實濠江的賭收數據，話唔埋等手機設備股炒到咁上下，又再由濠賭股接力。

此外，尾市前傳來發改委擬將中國黃金集團與五礦集團合併，相信又係央企改革的一個新舉措。受消息刺激，中國黃金國際（02099）升逾半成，五礦資源（01208）升1%，五礦地產（00230）則無升跌。

依據早前傳出五大電力集團擬重組成三大的消息一出，涉及的中資電力股僅炒短暫時間的經驗來看，相信中國黃金與五礦合併的刺激亦只屬短暫，最終還是要知道重組細節，將來各上市公司定位如何，才知誰是明日之升。

神華長線可分注收集

講開電力股，華能國際（00902）公布次季完成發電量按年增長31%，完成售電量增長31%；上半年完成發電量及售電量按年增長同為27%，平均上網結算電價上升3.3%，整體表現都唔差。不過，華能昨日股價偏軟，跌0.18%。

其實，電企用電量可反映出經濟活動情況，看來首兩季內地經濟表現確實比想像中穩定，這一點能否成為重估H股以至A股市場的動力，第三季埋單會有答案。

至於話說五大電企要合併成三大，其中一個方案係中國神華擬與國電電力集團重組合併，成為「神電」集團，到底成唔成事，不妨放長雙眼等着瞧。不過，論業務多元化，其實中國神華（01088）已為一家結合資源及能源上下游業務的綜合性能源企業，睇好內地經濟長遠發展，呢隻股值得作長線持有。

次季以來，神華股價由低位14.3元左右，反覆上升至現價17.98元，為一五年中以來高位，有貨可以繼續安心持有，未有貨的長線亦可分注收集。

古勝