絲絲講場:信用卡滿意度 東亞排榜尾

市場研究公司J.D. Power最近調查發現,香港人揀信用卡時,最留意嘅係有乜着數。調查仲列舉咗包括9間銀行嘅信用卡持卡人整體滿意度排行榜,東亞銀行排榜尾。

港人揀卡首重獎賞優惠

調查顯示,獎賞計劃及優惠係香港人選擇主要信用卡時嘅關鍵因素,而現金回贈就最受歡迎。

睇番個信用卡滿意度排行榜,以熟悉嘅銀行計,星展同花旗都排好高位,反映持卡人對張信用卡嘅客戶互動、帳單及繳費、信用卡條款、優惠及服務等方面滿意度都幾高。至於低於研究平均值嘅就有3間銀行,東亞排榜尾。

調查亦發現,愈來愈多持卡人將消費整合至一張信用卡,揸多過一張卡嘅客戶比率由去年嘅80%下降至72%;仲有就係,儘管獎勵計劃漸趨豐富,但竟然有超過七成人未充分了解計劃嘅具體內容!咦,好似講緊絲絲!

余絲韻