絲絲講場：保安突加強證監驚乜？

就喺呢個風頭火勢嘅時候，證監會於長江集團中心35樓嘅辦公室大本營保安突然加強。唔通真係要摺起衫袖，擺出戰鬥格，打到嚟？

訪客須預批方可上樓

長江集團中心一向都有訪客登記措施，以往到訪證監會，喺長江集團中心地下接待處登記咗個人資料，就可以上去，過程既快且方便。

不過，最近要上去證監會35樓大本營就冇咁輕易嘞，要證監會先交訪客個名畀樓下接待處，先可以登記訪客身份。

35樓加玻璃門 實Q把關

上到去35樓，仲設有一道玻璃門，有一個保安哥哥把守住，待確認訪客身份同掛上訪客名牌先可以進入。有唔少上過去證監會嘅人都覺得有少少奇怪，心諗唔知發生乜事！

其實證監會呢大半年，真係動作多多，既成立跨部門專組，又採實時監管，四處點火頭打擊各種市場不當行為，呢個時候又突然加強保安……

有唔少金融監管機構都要先交訪客名先可登記進入，所以證監會最新保安安排都好正常。不過，喺呢個時候突然加強保安，唔通係絲絲諗多咗？

余絲韻