Market Insight：新晨動力搭轉順風車

股市跟紅頂白，大媽炒到火紅火綠的吉利汽車（00175）抖緊氣，其他汽車股即接力炒，長城汽車（02333）昨升7.8%，華晨（01114）升5.5%，廣汽（02238）升2.7%。

華晨已先行踩油

華晨昨創52周高，鑊氣十足，4.3億元成交更吸引到古勝注意，一來對比PE經已25倍開外的吉汽，18倍的華晨較易入口，且華晨寶馬車款今年進入更新周期，銷售數字斷估有唔錯的增幅；再者，華晨啱啱以1蚊人仔代價，向雷諾出售49%審陽華晨金杯，為營收狀況麻麻的金杯搵到新靠山。

內地車網傳華晨寶馬會進入新能源車市場一段日子，目標是3系及5系推Hybrid板本。其實早於三月華晨旗下引擎生產子公司新晨動力（01148），當時業績麻麻，股價由績前1.87元落到最低1.1元先至識停。業績通告內，其實有提過成立團隊開發混合動力引擎，再睇近排華晨孖寶股價雙雙異動，華晨破埋15元橫行阻力頂，似是好事近，一於搭順風車走轉新晨動力。

環球央行轉軚收水

港股缺乏方向，昨日恒指跌56點收報25,465點，尚未返回六月大市橫行上落區間底部25,565點，意味着尚未解除進一步下試25,200點樓下的威脅。騰訊（00700）被官媒唱衰後，即使多間大行護航，仍舊有獨力難支的味道，昨日即市見275元後，縮番到271.8元收市，微升0.29%。

港股穿底唔行，昨日市況牛皮，大戶好明顯一副睇定啲，等埋美國就業數據出籠先郁手姿態。如果恒指唔盡快重返25,600點，要延續上半年連升六個月的強勢可能有啲難度。

美國近期的經濟數據未算標青，通脹更有退潮迹象。唯獨聯儲局掌舵人倫媽繼續信誓旦旦延續加息步伐，聯儲局開始制訂「縮表」路線圖，連歐英央行都暗示不排除收水，全球資金氾濫的日子隨時在今年內結束。

美股要小心物極必反

十年前金融海嘯爆發，央行開始瘋狂歲月，靠狂印銀紙令鈔票貶值，浮起危急存亡的全球經濟，股票、物業、名畫、藝術品投資者，在錢唔值錢期間人人笑逐顏開，肥仔到連襪都着唔到。所謂物極必反，萬一齊齊掉轉頭收水，各類資產泡沫會點發展，睇怕都唔使畫公仔畫到出腸。

近排環球債市開始有反應，德國十年債息短短半個月，由唔夠0.25厘衝上0.52厘，升至一年半高位。一直唔信《狼來了》故事的美債，亦蠢蠢欲動，過去六個交易日由0.21厘升至0.233厘。

孳息抽一成一睇落唔覺大件事，但以全球最大賭場而言，幾日之間行了這個幅度，實際已經唔係嘢小。到底係債市杞人憂天，抑或股市玩家太過坐定粒六？今晚數據會有一定啟示，市場估緊上月非農職位增加17.5萬個（五月為14.7萬），萬一數據過強，等於開綠燈畀聯儲局九月再加息，屆時美股只怕有得震無得瞓。

古勝