絲絲講場：帽后幫行家搵「第二春」？
每次見到飛達控股（01100）副主席顏寶鈴（顏太），呢位帽后話題一定離唔開孟加拉，今次顏太仲叫其他有困難嘅行家可以搵佢傾傾「第二春」添！
喜見孟加拉廠上軌道
其實顏太講嘅「第二春」係孟加拉業務，事關佢四年前去孟加拉做開荒牛，捱咗幾年終於捱出頭來，依家當地業務漸上軌道，佢發夢都識笑咁話喎。
佢話「一帶一路」政策下，孟加拉呢幾年已經發展咗好多，唔係想像中咁落後，所以佢鼓勵其他有經營困難嘅港商唔好咁容易放棄，不妨搵佢傾吓計，相信自己一個女人仔得，其他人都得咁話。
佢仲希望政府都支持吓港商去孟加拉開廠，等更多企業走出去搵到出路。
其實顏太當年可以隻身飛去孟加拉開荒，又點只係「一個女人仔」咁簡單！
余絲韻