絲絲講場：友邦出動「沙排孖妹」Sell積金

呢兩位靚女就係港隊「沙排孖妹」吳天麗同黃婉媚！做咩賣強積金要出動到佢哋？原來友邦強積金係想突出新基金嘅「雙打策略」特色。

夥惠理 投資中港股債

話說香港人嘅強積金偏好重倉中港股市，但就懶得自己做資產調配。睇準香港人懶到出汁，友邦強積金今次就夥拍惠理基金，推出全港首隻「中港動態資產配置基金」，主打靈活投資中港股債市場。

咩叫動態資產配置？就係指惠理嘅基金經理可按市況調節基金股債比例，當中股票佔比由10至90%，其餘為債券，較特別嘅係有最多9%可投資於黃金ETF。

產品似打波「進退有度」

惠理基金高級經理鍾慧欣（Kelly）話，基金經理會每個月檢視基金選股，萬一遇到金融大事仲會即時作出調配，而投資黃金ETF可有助分散風險。Kelly仲話睇好第三季股市表現，所以新基金現階段超過一半資產會投資股票。

友邦強積金行政總裁馮裕祺（Stephen）話，呢隻新基金嘅操盤特色就好似「沙排孖妹」咁，進退有度，攻守兼備，所以今次力邀「沙排孖妹」幫手。呢隻新基金收費為淨資產值嘅1.2%，但要留意番未必個個啱玩，主要適合風險胃納中至高水平嘅打工仔。咁又係，任何運動都有風險，沙灘排球都有番咁上下難度o架！

余絲韻