絲絲講場：新盤與袋巾有乜關係？
賣樓賣到講儀態？九龍建業（00034）西營盤63 Pokfulam尋日就請國際禮儀形象顧問陳靜雯出嚟，仲搵埋九建市務及銷售部總經理楊聰永做Model，示範點樣以袋巾配搭不同場合！
楊聰永過Model癮
陳顧問即場教大家四款不同袋巾與不同摺法。藍色袋巾就啱朝早上班，因為摺法方便，僅需時幾秒；想識新朋友時，最好就配搭鮮艷嘅紅橙色袋巾。佢仲教埋點從個人儀表、飾物穿戴、服裝配襯方面着手，提升個人形象。
搞咁多，查實都係軟銷個新盤嘅酒店式禮賓服務，陳顧問就係為樓盤嘅物業管理團隊做指導。楊聰永不忘九建高層身份，話項目最快本周末上載樓書及開放示範單位予傳媒參觀，項目或會分5個階段發售，每半年推出約70伙。
余絲韻