絲絲講場：中銀與貝聿銘百載緣
今年慶祝100周年嘅中國銀行（香港）（02388）最近特別多搞作，除預告會發紀念鈔之外，又於中環中銀大廈地下搞展覽，展示出唔少歷史珍藏。其中一份展品，仲要出動到母行中國銀行（03988）行長陳四清與中銀香港副董事長兼總裁岳毅親自飛去「請」番嚟。
貝聿銘父親為首位經理
話說陳四清同岳毅今年五月初，親自飛去紐約探望著名建築師貝聿銘，邀請貝聿銘喺中銀年報上簽名留念，作為展覽其中一項展品。
事實上，貝聿銘與中銀香港嘅關係可以用千絲萬縷形容。貝聿銘除咗係設計中銀大廈嘅建築師外，佢父親貝祖詒亦係中國銀行香港分號正式升格為分行後嘅第一位分行經理，貝祖詒一九一四年已經加入中國銀行服務，淵源幾咁深。
更加巧合嘅係，原來貝聿銘與中銀香港今年齊齊踏入100歲生日，貝氏可謂見證住中銀香港嘅成長。
同場展品仲包括一張面值五蚊但當一蚊港紙用嘅舊銀紙。原來喺一九四一年，礙於戰爭關係，來往香港航道被日軍封鎖，當時英國印製嘅鈔票無法運來香港，香港政府於是向中國銀行借用內地使用嘅五蚊紙幣，蓋個印就當成1蚊港紙應用。不妨睇睇屋企櫳底有冇都收埋一張半張？
余絲韻