Market Insight：投資最忌貪勝不知輸

可能大家都估到，在下所講的正是五月當紅炸子雞騰訊控股（00700），今年以來累升幅度逾四成，昨日終於有點高處不勝寒之象，股價先升後回，典型的高開低收格局。事實上，眼見騰訊喺280元阻力大，午後多咗人沽貨食胡都係正常不過。獲利過後，係咪再睇位翻兜抑或開淡倉，都係後話。

如果騰訊真係睇到300元，現水平再上空間約一成，而回吐可能要試番250元水平承接，即係值博率一半半。冇平貨喺手，呢啲價博唔博真係見仁見智。不過，鍾意即日鮮炒出炒入輪證刀仔鋸大樹者，難得有隻重磅股咁大波幅，可大顯身手。

順帶一提，前日異動的彩票股昨普遍回吐，第一視頻（00082）回吐12%，收報0.275元，成交縮至3,151萬元；中彩網通（08071）跌4.8%、華彩（01371）跌1.9%、御泰中彩（00555）跌2.4%，唯獨眾彩股份（08156）升7%報0.88元，成交1,881萬元。整體上板塊沽壓有限，總覺得會有下文，不妨靜觀其變。

大戶頂住高位結算

騰訊昨日炒到上高位見280.6元後回吐，最終收報275.2元，跌0.07%，成交96億元。由二線藍籌發力撐市，銀河娛樂（00027）升4%、中國聯通（00762）則升3.8%，似乎期指結算前點都要頂住喺高位。

內險股升近蟹貨區

此外，受中保監支持險資投資重大工程的消息刺激，近期表現向好的內險股亦未見太大回吐壓力，中國平保（02318）再創52周高位；中國人壽（02628）以及新華保險（01336）均微升作結。

古勝都喺嗰句，內險股已回升至接近一五年A股大時代後的蟹貨區水平，類似平保股價喺50元關阻力非輕，除非有重大利好消息跟尾，如A股氣氛明顯改善等，否則短期再上的空間可能一成唔到。再講，如果第三季尾有重磅民企或紅籌納入國企指數，部分現成重磅國指成分股，特別係中資金融股的比重可能下降，故亦須注意相關資金部署。

手機設備股暫無運行

今年以來，手機設備股同汽車股都係基金輪流炒的熱門對象。手機設備股的高估值和民企背景，卻吸引了一班「空軍」的注意，沽空機構狙擊瑞聲科技（02018），為手機設備股高潮畫上句號。現時瑞聲尚未復牌，昨日又輪到通達集團（00698）股價突然異動，一度急跌至2.12元。

市場傳聞四起，有指僱員行使認購權估平貨、又有指主要品牌客戶削訂單，幸公司隨即發通告澄清，並指擬回購公司股份，穩住股價，但埋單都唔見近一成，收報2.38元，成交9.46億元。

早前沽空機構就瑞聲發報告，引發股價震盪，剛巧通達主要股東擬以2.85元配售3.86億股減持，套現11億元，結果配股還是順利完成，反映喺板塊氣氛轉差，公司大股東都能有抽水行動，都算唔簡單。查實，即使公司根據購股權計劃向員工發行認購權獲行使，照計都不足以導致昨日股價如此波動，呢個唔會係導致股價急挫原因；至於傳聞話遭品牌客戶削訂單，公司已作否認，故不宜再作評論。

總而言之，呢期手機股板塊處多事之秋，冇貨喺手都無謂多手，有貨喺手就睇實股價，一旦失守止蝕位就要嚴格執行止蝕。

古勝