Market Insight：中移有突圍催化劑

逐步推動電訊業混改

此外，環顧藍籌多個板塊都有不同程度的升幅，惟見中資電訊股仍相對落後，其中中國移動（00941）昨偏軟收報85.8元。不過，擬留意如博中移發力追落後，公司派發末期息每股1.243元將於六月二日除淨，沾手相關Call輪須注意正股除淨因素。

再講番中移基本因素，最近有內地傳媒報道，隨着中國聯通A股（600050.SH）進行混改試點，中移與中國電信（00728）亦會喺三年內逐步完成混改。古勝認為，喺三大之中，中移仍是實力之選，但雖具高現金流及市佔率佔優的特質，但整體盈利表現相對平穩，股價表現難起太大漣漪。

反而，未來可以關注，巨型科網民企業如騰訊，將如何與傳統電訊商展合作，甚而會否落實在混改方案中引入民企作為戰略股東，則對兩者合作的協同效益憧憬，有機會成為電訊股股價突圍的催化劑。

恒地買靚地應該計晒數

港股昨日回吐，恒指收市跌42點報25,293點。恒基地產（00012）投得中環美利道商用地皮，地價和呎價均創新高，誕下新地王！雖然恒地高價奪得心頭好，但投行似乎未係好受落，皆因以作價計回報唔算吸引咁話，故見恒地股價受壓，收報49.45元，跌1.49%。

其實，古勝亦不得不佩服四叔，過去十年八載不斷喺市區買舊樓重建，如今收穫甚豐。以目前恒地的財務狀況，絕對有能力發展美利道項目。由於中環黃金地段甲級寫字樓地皮供應絕無僅有，呢一刻可能買貴一啲，但只會買貴唔會買錯！

好似當年香港站上蓋發展項目喺一九九六年招標，由恒地、煤氣（00003）及新地（00016）等合組的財團以300億元奪得二至四期項目發展權，當年哄動全城，可如今成國際金融中心已成為中環地標，租金回報可觀，足證四叔的眼光！所以，今次奪得地王，短線招來沽壓沒甚麼大不了，長線仍繼續睇好恒地。

至於現成的地產股，美銀美林就話，長實地產（01113）可受惠，皆因傳擬出售的中環中心或可以叫高啲價，並有機加快推動和記大廈重建。長實地產昨收報57.45元，升1.23%。

港鐵防守強可坐貨

早前提及的港鐵公司（00066）又創新高，小股東真係飲得杯落。公司高層透露，擬於未來一年推出六個物業項目，其中上月接受投標的錦上路上蓋第一期，將提供1,650個住宅單位。

買美圖中伏冇仇報

事實上，今明兩年港鐵有大量新樓盤動工，而鐵路業務穩定，公司既能獲益於本地樓市升勢，亦有穩定而可觀的鐵路業務現金流來源，對比其他地產股較具防守性，股價迭創新高不無道理。古勝都繼續睇好港鐵，已上車者可穩坐釣魚船。

昨日晨咁早就聽到有人食詐胡！事緣前日傳來MSCI中國指數將美圖公司（01357）納入為成分股，點知昨日又話取消，搞到美圖昨股價急跌，收報9.8元，跌逾9%。

一般估計，美圖今次食詐胡的原因係市場流通量不足。不過，呢單嘢似乎顯示咗大摩處理手法唔夠專業，雖則話投資者買賣係自己決定，但前日先聽到佢呢頭話納入跟進美圖，翌日又話取消加入，中伏輸錢真係冇仇報！

古勝