絲絲講場：蓋茨教讀最有錢途三科
準大學生或準大學生嘅阿爸阿媽注意！入大學揀邊科最有前途？全球最有錢嗰位話，若畀佢生於依家，佢大學會揀呢三科讀：AI（人工智能）、能源、或生物科學。
「最能夠改變世界」
講嘅係微軟創辦人蓋茨，佢周一喺Twitter發文話，若然畀佢今時今日重返校園，佢會以上三科揀一去主修，話喺呢三個範疇發展最能夠改變世界。
呢三個範疇前景係點？不論科技與經濟專家都話，未來二十年AI應用將會反轉工廠、建築地盤及零售業。
至於能源方面，全世界都想開拓更多太陽能及風電等能源，連蓋茨本身都預言過話15年內會出現「能源奇迹」。
生物科技就更加唔使講，淨是美國市場就已增長驚人，啲私人公司爭住發展藥物及療法去對治啲已經唔驚抗生素嘅病菌。
報咗Jupas（大學聯招），諗諗吓想轉科？下周二（廿三日）中午前仲可以轉，咪話絲絲唔提你。
余絲韻