大大大新聞呀！一六年藍籌升幅王瑞聲科技（02018）遭唱淡，失守紅底後，怒跌逾一成收市呀！沽空機構Gotham City（印象中，這間公司好似是初出茅廬，第一次發炮。此前，我只是從《蝙蝠俠》的電影中聽過有關「葛咸城」的事迹啫！）都算初生之犢不畏虎喇，第一次出手就向高難度挑戰，搞隻咁傑出的藍籌股。
其實無壞嘅，他們本身都是nobody，攻擊不成咪又係nobody；攻擊得手就不同喇，隨時可以同渾水（Muddy Waters）、香櫞（Citron）齊名，雞蛋推冧道石牆，幾咁名垂千古呀！
Gotham City今次處女下海，梗係要先聲奪人啦！他們給予瑞聲40至50元目標價，喂喂喂，出手未夠狠喎，人家渾水同香櫞一出手就畀零蚊，於這方面，我略嫌你未入流囉！不過咁，你話40至50元？有無可能先？你賣畀我吖！
我是於62元帶領我的粉絲於英國脫歐公投之後的禮拜一買瑞聲的。同一時間買入的，還有170元的騰訊（00700）同27元的舜宇光學（02382），全部都是持有到依家。我當時給出的意見是「持有直至永遠」，原因是科技就是將來！
一路上，有幾多人於72、82、92元就估頂呀？到頭來都追悔莫及。今次事件一定有好多人出來踩多兩腳個喎，吃不到的葡萄是酸的！瑞聲的本質無變，不過有報告纏身的公司不嬲都要警惕。等集團澄清啦，到市場重新出現大成交買上的時候，幾多都要追，後市繼續係睇無頂。
富昌金融研究部總監 譚朗蔚（作者為註冊持牌人士，持有瑞聲、騰訊及舜宇）