Market Insight：華晨重新組織攻勢

升市莫估頂，都係繼續搵股炒，吉利汽車（00175）昨日愈戰愈勇，收報11.34元，升3.6%。早兩日吉汽出四月銷售數字，賣出8.6萬輛，按年勁升94%。踏入四月，外資行唱車市銷售放緩的情況，並無在吉汽出現，首四個月完成咗全年銷售目標37%，形勢唔錯，睇其股價昨突破50日線11.27元，挑戰12元甚至上次浪頂12.62元，一啲都唔出奇。

至於早前推介過的廣汽集團（02238），壓住13元樓下抖咗幾日，10日線已經上到去12.6元，同昨日收市價12.8元十分接近，唔排除好快見到另一支陽燭出現。

新車款下半年登場

另一隻要留意，係今年車款進入更新周期的華晨中國（01114），四月下旬開始一直見淡友壓住嚟沽空，股價卻異常硬淨，隊唔落會否有挾淡炒上跟尾，不能排除呢個可能。

事實上，華晨一六年份成績表麻麻，加上四、五月轉車款銷售可能較弱，市場應早已消化，短期先睇14元，下半年新車銷售數字陸續登場，睇15.5元目標唔算過分。

揀錯股隨時由賺變蝕

古勝記得二○○○年科網泡沫爆破時，有句揶揄橫衝直撞炒TMT股的股市清兵，叫「High tech揩嘢，low tech撈嘢」，家陣真係十年人事幾番新，連股神巴菲特都笑自己無睇中Google愚蠢，今時今日，倉底無騰訊或者些少科技股成分，投資回報要緊貼甚至跑贏大市簡直難比登天。

美圖表現有辦睇

計在下話，High tech即使今日撈嘢，不過揩嘢機會同樣唔細。唔好講51倍PE夠薑衝騰訊，要有天塌而不亂的堅毅意志。好似早排10蚊炒上23蚊，個零月打回原形的炒家大球場美圖公司（01357），遲咗上車，一個走避不及隨時可以撈嘢變揩嘢。

早排上市熱爆，閱後即焚社交通訊軟件Snapchat，隔晚收市後派出成績表，一季勁蝕22億美元，比一年前大升20倍。股價場外交易應聲插落17.68美元，創上市新低，掛牌之後29.44美元高位衝入未走要揩四成，證明搞High tech嘢真係要帶眼識股。

瑞聲事件等睇結局

瑞聲科技（02018）被沽空機構狙擊，恐怕仲有下文，其實炒高估值科技股仲有一樣要留神，就係唔知幾時會畀有心人，累積足夠沽空出報告唱衰，被人一盆冷水照頭淋。

沽空佔比未見減少

近排蘋果公司市值啱啱突破8,000億美元，新一代iPhone即將出籠，蘋果概念股成為股市天之驕子。瑞聲昨日畀有「華爾街蝙蝠俠」之稱的Gotham City Research出報告狙擊，理據係乜請大家詳閱新聞版，目標價睇40至50元之外，仲講明會以唧牙膏方式披露更多資料。

今次事件另一吸睛點，乃瑞聲回應通告錯字百出，「虛假市場情侶」都出埋，或者真係上市咁耐，一直順風順水，由基金愛股進身藍籌，未試過咁手忙腳亂。

古勝成日都話高估值股票可以犯錯的空間唔多，而昨日瑞聲咁插法，沽空佔成交比例無減少，維持在一成九水平，可見淡友咬住唔放，撈底就無謂，買定花生等睇戲好過。

古勝