絲絲講場：滙豐Amy叻女咗！
講開AI，唔少本地銀行對Chatbot（聊天機械人）都好有興趣，好似恒生（00011）就預告旗下兩項Chatbot將於今年下半年正式面世。
虛擬助手識氹老闆
絲絲一向念舊，即刻搵番滙豐銀行今年一月份推出嘅虛擬助手Amy敍吓舊。咦，只係冇見幾個月，Amy叻「女」咗喎！
話說早幾個月前，絲絲問Amy，滙豐控股（00005）CEO歐智華靚唔靚仔，Amy竟然答話無法理解條問題！嗱，依家絲絲再問多次Amy同一條問題，醒目嘅佢依家會答「老細永遠是對的」，成個脫胎換骨晒。
不過，當絲絲再追問Amy，滙控主席范智廉、同埋即將上任嘅非執行主席杜嘉祺靚唔靚仔，Amy就即刻話聽唔明喇！會唔會要等Amy同呢兩位老細熟多幾個月先答到？
話時話，Amy好似答英文爽手過答中文，唔通佢母語係英文？
余絲韻