絲絲講場：股神鬥得贏人工智能？

「價值投資法」着重睇上市公司「內在價值」（Intrinsic Value）。呢份研究發現，實際運用呢套投資方法嗰時，睇P/B（市帳率）呢類指標只係計算公司內在價值嘅一個起點，仲要加埋人為判斷，先至可以發掘到被低估嘅潛力股。

CFA兩年後考埋科技

簡單啲講，齋靠設定規則，公式化咁買賣股票，未必可以跑贏大市，事關規則依據嘅係過去數據。結論係，唔可以齋靠電腦或齋睇乜率乜率嘅投資模式，一定要有埋過人嘅洞察力，先做到股神。

不過另一方面又咁喎！報考CFA要注意！事關協會計劃會喺二○一九年考試加入有關人工智能（AI）、機械人財務顧問及分析大數據等考題。

協會負責資格認證嘅董事總經理Steve Horan預料，加入新考題後會吸引更廣泛嘅應考生，特別係金融科技從業員。

CFA三級考試範圍，係一般有4年經驗投資經理要識嘅嘢。點解要加新考題？皆因協會課程顧問本周開會，考慮到現時行業轉變。好似機械人財務顧問呢類多靠程式、冇乜真人互動嘅業務，自一二年起又真係爆多。

Horan又話，現仍好難區分將來邊啲科技能經得起時間考驗，所以協會關注點都係喺番金融業目前用緊嘅工具與使用方法。

聽講佢哋現時冇話要考埋寫電腦程式，所以唔使擔心冇科技專業背景會比其他人蝕底。真係唔使擔心？照絲絲睇，暫時咁啦。

余絲韻