Market Insight：港鐵隨時財息兼收

騰訊控股（00700）股價不負所望，昨日喺收市競價時段以全日高位250.8元收市，真係強到冇朋友！公司將於下周三公布季績，此前有美國上市的京東（JD）先行公布季績，季度銷售額達762億元人仔，按年升41%，較市場預期為佳。

美國通用會計準則下，京東首季度淨利潤為3.557億元人仔，乃上市以來單季首次實現盈利，公司預測次季收入介乎880億至905億元人仔，反映對前景展望正面。行業龍頭企業季績佳，觸發在行內手執牛耳的騰訊股價亦大爆發，照計至少喺下周三騰訊公布季績前，都可以穩坐釣魚船。

今年以來，除咗科網股表現大翻身之外，唔知大家冇有發現，唔少香港人日日幫趁的港鐵公司（00066）股價都好似食咗大力菜咁，愈升愈多，昨日股價就再創新高46.5元，收報46.4元，升1.7%。

屈指一算，今年以來港鐵股價已累升幅度23%，唔使揸得多，就揸佢一手，利錢都足夠日日免費搭地鐵來回過海一轉有餘，小股東真係飲得杯落！港鐵派發末期息每股0.82元將於五月十九日除淨，可以多坐一會來個財息兼收！

互聯互通加碼做大禮

上大人到濠江視察，今次冇嚟香江，好似係因為七月回歸二十周年，有上上大人到香江，所以今次可免。講到七月，聽聞北方慶祝大禮之一係宣布深化互聯互通，由港交所（00388）公布債券通詳情。

另外，據聞港交所可能在七月推出貴金屬期貨，相信喺內地大戶眼中，黃金期貨會有一定的吸引力。

港交所股價昨日出現異動，高位上過194.7元，收報194.4，升2.53%。

事實上，除咗呢啲新產品之外，嚟緊周日喺北京召開的「一帶一路」國際合作高峰論壇，會唔會有更多「一帶一路」沿線國家的企業有興趣來香港上市，都值得關注吓。

港交所叩200元關

走勢上，昨日港交所支陽燭有成交配合，短線衝得穿195元的話，應該可以試叩200元大關，回吐初步支持可參考昨日平均成交價193.2元。

核電企業明顯蝕底

古勝昨日喺本欄提及，內地擬將主要火電和核電企業重組成三家，消息成功帶起整個板塊異動，其中表現最標青的係大唐發電（00991）股價一口氣升15%，收報2.59元，成交達3.77億元。華電國際（01071）及華潤電力（00836）分別升5%及7%，中國電力（02380）升2.45%。

炒消息避免表錯情

大摩發表的報告就話，最近內地電力行業的競爭激烈去到非理性的地步，官方推動行業整合有助減少競爭，亦可減少產能擴張，以免再在這產能過剩的產業繼續過度投資。

由於傳聞中的方案，乃神華與中廣核、大唐合併，而大唐是現時五大發電商中最少自供煤的，未來受惠合併後垂直生產的效益會較大，咁大概解釋到點解昨日大唐股價可以跑出！

不過，有一點大家要留意，以往核電企業被視為獨立於傳統電企的，但在今次流傳的合併方案中，核企將於傳統火電企業合併，意味過去核電企業所享有的光環消失，多元化綜合發電企業乃大勢所趨，目的要降低整體能源成本。是故，行業合併消息繼續發酵的話，要揀都係唔好揀核電股。

古勝