○九年累美林勁蝕要撇帳4.56億美元（約35.568億港元）嗰位交易員話，當年有如活喺核反應堆中做嘢，幾乎斷六親，除咗要贏，其他咩都睇唔到，根本唔覺一億億嘅係錢。
「未必關錢事，而係關要贏事！」Alexis Stenfors當年係美林駐倫敦資深外匯交易員，佢話當年情況就好似電影《飢餓遊戲》（The Hunger Games）個世界咁，道德？咩嚟o架？「唯一係為咗保命時，大家先會講合作，當一冇利用價值，就會背後捅對方一刀！」
即使佢有15年經驗，一樣賭錯市，愈蝕愈甘，就誇大持倉想隱瞞，「開始講大話，係自覺又或不自覺，逐漸你唔知自己由幾時開始呃人。」
最後爆煲，累美林勁撇帳，上晒國際財經新聞。
Stenfors被炒兼罰禁止從事交易活動5年，雖避過刑事檢控，但就甩唔走個污名，親戚朋友避開佢。結果佢睇咗心理醫生兩年，仲去讀Ph.D。就喺大學圖書館搵Research Paper時，就喺個「流氓交易員」榜上，佢又見到自己個名。
今時Stenfors係大學經濟金融系高級講師。個底花咗，仲有人肯請？系主任話「如果你係學生，怕且都想有位試過蝕過億嘅人嚟教啩？」咁算唔算洗咗底呢可？
余絲韻