絲絲講場:下屬柴台 鱷王Like爆

全世界最大對沖基金Bridgewater(橋水)嘅老細達利奧(Ray Dalio)出咗名嚴厲,當呢位地位超然嘅鱷王畀下屬直接批評「腦細」會點?原來鱷王最Like人一嘢「直拳」窩埋去講真話,千祈唔好同佢客氣。

被寸開會毫無準備

話說有日鱷王收到下屬封電郵,不留情面咁踩佢開會跌晒Watt:「Ray,你今日嘅表現係『D-』,開會完全冇啲準備,估唔到你會咁立立亂,以後開會前唔該你落多啲時間做足功夫……」

鱷王不單立即將封電郵傳晒畀全公司千五人睇,仲要喺Ted Talk公告天下,大讚「咁仲唔係正爆!我就係要呢啲咁樣嘅Feedback!」鱷王話,就係鍾意下屬唔畀面夠坦白,仲話要鼓勵呢種「極端透明」嘅公司文化。

系統篩選員工意見

你都想對老細咁「坦白」?嗱,坦白講,呢樣嘢就雙向嘅。鱷王公司有個內部軟件系統叫「Dot Collector」,每個員工都可以就其他同事嘅處事能力及方式畀分,資料內部公開,邊位靠唔靠得住、諗嘢有冇邏輯、幾有創意、夠唔夠醒目、連使錢使得聰唔聰明,都一目了然,員工做嘢完全冇得博大霧。

個系統會幫公司衡量每位員工有幾信得過,當遇上公司有啲決定需要員工表決時,系統會Out走可信程度低員工嘅意見。有冇諗起《動物農莊》嗰句「所有動物都平等,但有些動物比其他動物更平等」呢?

再講,諗住私下批評兩句,點知老細高調用嚟做演講開場個Gag,仲「哈哈哈,呢條友仔,做得好」咁。仲唔係擺明畀全世界睇,佢係真正揸Fit嗰個!鱷王有幾強勢,見識到未!

余絲韻