絲絲講場：蘇格蘭威士忌好炒過黃金！

全球資金氾濫，已經發展到咩嘢都可以炒餐勁。就好似○八年新出品嘅蘇格蘭威士忌，至今價格已經升咗143%，仲勁過黃金同白銀價格大約五成升幅，只係僅僅輸畀標普500指數嘅1.7倍升幅。

投資者想加入戰團？唔通要一箱箱咁入貨，仲要搵個酒窖擺放，咁咪幾麻煩囉？

咁當然係唔使啦，投資者實情唔一定要一桶桶或者一箱箱咁去買賣，原來英國有一間專門做金銀交易平台嘅公司Galmarley，近期仲出埋威士忌交易平台，等投資者可以直接買賣一桶桶威士忌，毋須自行買實物！

呢個交易平台真係啱晒威士忌炒友，手續同股票交易有得揮，有晒買賣差盤同差價，仲可以掛個限價盤排隊，投資者只要揀啱心水酒廠嘅威士忌，就可以進行交易，每個交易單位係一公升，仲有晒圖表同技術分析。

交易平台只收經紀佣金同威士忌存倉費，炒友係咪蠢蠢欲動呢？仲可以24小時交易添！

余絲韻