對沖國度：揀中好股票就係王道

筆者有時睇到一些投資者言論也覺得好笑，例如一方面睇恒指今年有機會升上29,000點，但另一方面則估計要先跌落23,000點水平，一心要賺到盡，所以就耐心等到23,000點才入市。

股票和樓其中一個主要分別，是股票每一注細得多，如果認為將會殺上29,000點，策略上一定要先落一注，萬一真的去到23,000點就再加一注，而不是十上十落等調整，只可以話香港有太多投資者高估自己測市的能力，太喜歡投機，而無心投資。

相比之下，自己並不覺得恒指今年會上29,000點，而的確有機會見一見23,000點，自己無睇得咁好，卻成手是貨，因為恒指的高低根本不重要，揀中股票才是王道。而難得世界變化大，有一批公司會持續好景，長線選股不算難。

走精面反錯失長線大浪

當然怕大輸，但就不怕百分之五左右的大調整，有上有落是正常，何況不敢冒風險，就不會有回報，即使這個位打九五折，也肯定遠遠勝過一早甚麼也擔心。

市場專收叻仔，聰明反被聰明誤的例子見得太多，一心走精面，只會聚集在短期的因素之上，通常一定會走失長線的大浪。

其實勇敢一點揀好股票來坐，會是初哥最容易而有效的投資方法，可惜大部分人太過細膽，被幾個巴仙的風險就嚇窒，是一事無成的主因。

豐盛金融資產管理董事　黃國英（作者為註冊持牌人士）